2026 жылғы 21–22 қазанда Алматы қаласындағы «Атакент» көрме орталығында Powerexpo Almaty 2026 XXIV халықаралық энергетикалық форумы ұйымдастырылады. Іс-шара энергетика саласының өкілдерін, мемлекеттік органдарды, технологиялық компанияларды, жабдық өндірушілерді, инвесторлар мен сарапшыларды бір алаңға жинайды.
Биыл форум Kazatomexpo көрмесімен қатар өтеді. Бұл қатысушыларға дәстүрлі және атом энергетикасы, электр және жылу желілері, энергетикалық машина жасау, коммуналдық инфрақұрылым мен цифрлық технологиялар бағытындағы жаңа әзірлемелермен танысуға мүмкіндік береді.
Форумның басты мақсаты – Қазақстанның энергетикалық инфрақұрылымын жаңғырту және оның болашақтағы даму бағыттарын айқындау. Күн тәртібінде электр энергиясына сұраныстың артуы, жаңа генерация қуаттарын іске қосу, қолданыстағы нысандарды жаңарту және электр желілерін кеңейту мәселелері қарастырылады.
Іскерлік бағдарламаның алғашқы отырысы «Алматы энергетикасы: 105 жылдық даму және жаңа өсу нүктелері» тақырыбына арналады. Пленарлық сессияда Алматы қаласы мен Алматы энергия торабының 2035 жылға дейінгі энергия теңгерімі, электр өндіру көлемін арттыру, магистральдық және тарату желілерінің жағдайы, сондай-ақ жаңа ірі тұтынушылардың энергетикалық жүйеге ықпалы талқыланады.
Кездесуде энергетикалық инфрақұрылымды қаланың даму жоспарларымен үйлестіру мәселесіне де басымдық беріледі. Пікірталасқа Энергетика министрлігі, Алматы қаласының әкімдігі, KEGOC, АЖК, «Самұрық-Энерго», Alatau City, «Инновациялық технологиялар паркі» арнайы экономикалық аймағы және ірі инфрақұрылымдық нысандардың өкілдері қатысады. Бұл энергиямен жабдықтау мәселелерін өндірушілермен қатар, ірі тұтынушылардың қажеттіліктері тұрғысынан да қарастыруға жол ашады.
Форумның жеке сессиялары энергетикалық жүйенің даму жоспарларын өзара үйлестіруге арналады. Атап айтқанда, қаланың өсу қарқыны, электр энергиясын өндіру көлемі және желілердің өткізу мүмкіндіктері арасындағы байланысты қамтамасыз ету мәселелері қаралады. Сонымен қатар 2030 жылға дейін жүзеге асырылуы қажет шешімдер мен 2035 жылға арналған инфрақұрылымдық міндеттер талқыланады.
Іскерлік бағдарлама аясында жылу көздерін, жылу электр орталықтарын және коммуналдық шаруашылық нысандарын жаңғырту, Қазақстанның болашақ энергия теңгерімін қалыптастыру, заманауи энергетикалық технологияларды енгізу мәселелері де қамтылады. Бұған қоса, деректер орталықтары мен жасанды интеллект инфрақұрылымын тұрақты электр қуатымен қамтамасыз етуге қатысты тақырыптар қозғалады.
Көрме алаңында электр энергетикасы мен тұрғын үй-коммуналдық шаруашылық салаларына арналған заманауи жабдықтар мен технологиялық шешімдер ұсынылады. Олардың қатарында электр энергиясын өндіру және тарату жүйелеріне арналған жабдықтар, есептеу құралдары, турбиналар, кабельдік өнімдер, оқшаулағыштар, автоматтандыру және цифрландыру жүйелері бар.
Powerexpo Almaty 2026 энергетика саласындағы өзекті мәселелерді талқылауға, жаңа технологияларды таныстыруға және салалық ұйымдар арасындағы іскерлік байланысты нығайтуға бағытталған халықаралық алаң болмақ. Форум энергетикалық инфрақұрылымды дамытуға қатысты мемлекеттік құрылымдар, бизнес өкілдері мен инвесторлар арасындағы тәжірибе алмасуға мүмкіндік береді.
