Қазақстан Үкіметінде Премьер-министрдің орынбасары – ұлттық экономика министрі Серік Жұманғариннің төрағалығымен өткен кеңесте елдегі инфляцияның қазіргі жағдайы және азық-түлік бағасын тұрақтандыру бағытындағы жұмыстар талқыланды. Жиында әлеуметтік маңызы бар өнімдердің бағасын бақылау, халыққа қолжетімді тауар ұсынысын арттыру және маусымдық қымбатшылықтың алдын алу мәселелеріне басымдық берілді.
Сауда және интеграция министрлігінің мәліметінше, азық-түлік инфляциясы екінші ай қатарынан төмендеп келеді. Оның көрсеткіші дефляциялық деңгейде, яғни минус 0,1% шамасында сақталған. Бағаның өсу қарқынын баяулатуға әлеуметтік маңызы бар азық-түлік тауарларының бағасындағы өзгерістер елеулі ықпал етіп отыр.
Жыл басынан бері әлеуметтік маңызы бар өнімдердің бағасы 1,8%-ға өскен. Өткен жылдың осы кезеңінде бұл көрсеткіш 8,3% болған. Осылайша, биылғы баға өсімі былтырғы деңгейден 4,6 есе төмен тіркелді.
Өткен аптада бірқатар азық-түлік өнімі арзандаған. Атап айтқанда, қанттың бағасы 2,4%-ға, пияз 1,7%-ға төмендеді. Алма мен сәбіз 0,9%-ға, күріш 0,5%-ға, қой еті 0,4%-ға арзандаған. Нан, макарон өнімдері, сары май, тұз және шай бағасында өзгеріс болмаған.
Сонымен қатар күннің суытуына байланысты кейбір көкөністер қымбаттай бастаған. Бір апта ішінде қияр бағасы 4,6%-ға, қырыққабат пен қызанақ 3,7%-ға, картоп 2,4%-ға өскен. Маусымдық өзгерістердің бағаға ықпалын азайту мақсатында алдағы қыс және көктем кезеңінде жылыжай көкөністерін өндірушілермен арнайы меморандумға қол қою жоспарланып отыр.
Бағаны тұрақтандырудың маңызды тетіктерінің бірі ретінде ауыл шаруашылығы жәрмеңкелерінің жұмысы аталды. Мұндай сауда орындарында өнім өндірушілер тауарларын делдалсыз, тікелей тұтынушыларға ұсынады. Бұл тұрғындарға қажетті азық-түлікті қолжетімді бағамен сатып алуға мүмкіндік береді.
Бұдан бөлек, 17–27 қазан аралығында еліміздің барлық өңірінде Bereke Fest және Республика күніне арналған сауда акциялары өткізіліп жатыр. Оларға 649 сауда нысаны қатысуда. Науқан аясында күнделікті сұранысқа ие тауарлар мен азық-түлік өнімдері 50%-ға дейінгі жеңілдікпен ұсынылады.
Кеңес барысында Серік Жұманғарин азық-түлік инфляциясы өскен облыстардың әкімдіктерінің есептерін тыңдады. Вице-премьер барлық өңірге ауыл шаруашылығы жәрмеңкелерінің санын көбейтіп, тұрғындар жиі тұтынатын өнімдердің жеткілікті көлемде әрі қолайлы бағамен сатылуын қамтамасыз етуді тапсырды.
Жалпы, Үкіметтің негізгі міндеті – азық-түлік нарығындағы тұрақтылықты сақтау, маусымдық баға ауытқуларының әсерін төмендету және халықтың күнделікті қажетті өнімдерге қолжетімділігін арттыру. Бұған дейін Қазақстан Ұлттық банкі алдағы жылдарға арналған инфляция болжамдарын қайта қараған болатын.