Астана, Алматы және Шымкент қалаларында қоқыс жағатын зауыттар салу жоспарланып отыр. Қазақстанда қалдықтарды энергияға айналдырып кәдеге жарату жобалары бойынша үш қытайлық инвестормен келісім жасалған.
Экология және табиғи ресурстар министрлігінің мәліметінше, зауыттарда барлық қоқыс жаппай жағылмайды. Алдымен қалдықтар сұрыпталып, қайта өңдеуге жарамды материалдар бөлініп алынады. Тек қайта өңдеуге келмейтін қалдықтар ғана термиялық жолмен кәдеге жаратылады.
Жаңа кәсіпорындарды шығарындыларды автоматты түрде бақылау жүйелерімен және заманауи тазарту қондырғыларымен жабдықтау жоспарланған. Қолданылатын технологиялар еуропалық экологиялық стандарттарға сәйкес болуы тиіс.
Қазіргі уақытта Қазақстанда жұмыс істеп тұрған қоқыс жағатын зауыт жоқ. Жаңа жобаларды іске асыру полигондарға түсетін қалдық көлемін азайтып, қоқыстың бір бөлігін энергия өндіруге пайдалануға мүмкіндік береді.
Сонымен қатар болашақ кәсіпорындардың экологиялық қауіпсіздігі басты мәселелердің бірі болып отыр. Шығарындыларды тұрақты бақылау және тазарту жүйелерінің тиімді жұмысы маңызды болады.