Қазақстан Президенті Қасым-Жомарт Тоқаев Омбы қаласына жұмыс сапары барысында Екінші дүниежүзілік соғыс жылдарында жараланған жауынгерлер ем алған тарихи госпитальға барды.
Мемлекет басшысы соғыс ардагерлеріне арналған Омбы госпиталі ғимаратының қасбетінде орналасқан әкесі, майдангер-жазушы Кемел Тоқаевқа арналған ескерткіш тақтаға гүл шоғын қойды.
Президент Қасым-Жомарт Тоқаев Екінші дүниежүзілік соғыста Отан қорғау жолында қаза тапқан боздақтардың рухына тағзым етті. Бұл сапар соғыс жылдарындағы тарихи оқиғаларды еске алып, майдангерлердің ерлігін құрметтеу мақсатында өтті.
Кемел Тоқаев Омбы госпиталінде ем алған
Омбыдағы әскери госпиталь Ұлы Отан соғысы жылдарында маңызды медициналық мекемелердің бірі болған. 1941 жылдың шілдесінен бастап мұнда майданда жараланған 150 мыңға жуық жауынгер емделіп, денсаулығын қалпына келтірген.
Солардың қатарында Мемлекет басшысының әкесі Кемел Тоқаев та болды. Ол соғыс кезінде ерлікпен шайқасып, жарақат алғаннан кейін 1945 жылдың ақпанынан маусым айына дейін осы госпитальда ем қабылдаған.
Кемел Тоқаев – қазақ әдебиетінде детектив жанрының негізін қалаушылардың бірі, майдангер-жазушы. Оның өмір жолы мен шығармашылығы ел тарихымен тығыз байланысты.
Президент госпиталь тарихымен танысты
Ескерткіш тақтаға гүл қою рәсімінен кейін Қасым-Жомарт Тоқаев майдангерлерге арналған Омбы госпиталінің құрылу тарихымен және қазіргі қызметімен танысты.
Мемлекет басшысы аталған медициналық мекеменің Екінші дүниежүзілік соғыс жылдарындағы рөліне ерекше назар аударды. Госпиталь тарихы – мыңдаған жауынгердің өмірін сақтап қалған медицина қызметкерлерінің еңбегінің және соғыс жылдарындағы халықтың қажырлы күш-жігерінің айғағы.
Президенттің Омбы госпиталіне сапары – тарихи жадыны сақтау, майдангерлер ерлігін ұлықтау және кейінгі ұрпаққа бейбітшіліктің қадірін жеткізу жолындағы маңызды қадамдардың бірі болды.