Шымкентте баспанаға мұқтаж азаматтарды тұрғын үймен қамту жұмыстары жүйелі түрде жалғасуда.
Бүгін Бозарық шағын ауданында жаңа пәтерлердің кілтін табыстауға арналған салтанатты шара өтіп, 40 отбасы қоныс тойын атап өтті. Іс-шараға қала әкімі Ғабит Сыздықбеков қатысып, жаңа пәтер иелерін баспаналы болуымен құттықтады.
Тұрғындарға 1, 2 және 3 бөлмелі, толық әрленген пәтерлер жалға беру тәртібімен ұсынылды. Сонымен қатар тұрғындарға баспананы кейіннен сатып алу мүмкіндігі қарастырылған. Жаңа үйлер заманауи талаптарға сай салынған және тұрғындардың жайлы өмір сүруіне қажетті жағдайлар жасалған.
Бұл жолы пәтер алушылар қатарында әлеуметтік осал санаттағы азаматтар болды. Атап айтқанда, жалғызбасты аналарға, ерекше бала тәрбиелеп отырған ата-аналарға және толық емес отбасыларға басымдық берілді. Жаңа баспанаға ие болған тұрғындар үшін бұл күн көптен күткен қуанышқа айналды.
Шымкентте тұрғын үй мәселесін шешу бағытындағы жұмыстар алдағы уақытта да жалғасады. Биыл қалада жалпы 7 386 пәтерді пайдалануға беру жоспарланған. Қазіргі таңда оның 3 370-і тұрғындарға табысталды. Қалған пәтерлер жыл соңына дейін кезең-кезеңімен беріледі.
Жаңа баспаналардың ел игілігіне берілуі – азаматтардың өмір сүру сапасын арттыруға бағытталған маңызды қадам. Тұрғын үймен қамту жұмыстарының жалғасуы баспана кезегінде тұрған азаматтардың мәселесін кезең-кезеңімен шешуге мүмкіндік береді.
Бозарықтағы 40 отбасы үшін жаңа пәтер – жай ғана баспана емес, отбасылық жылулық пен тұрақты өмірге бастайтын жаңа кезең. Әр отбасының қоныс тойы – қаланың әлеуметтік дамуы мен тұрғындарға жасалып жатқан қолдаудың нақты нәтижесі.