Президенттің елдің транзиттік-көлік әлеуетін дамыту жөніндегі тапсырмаларын жүзеге асыру шеңберінде елімізде темір жол желілерінің, автожолдар мен авиахабтардың ауқымды құрылысы жүргізілуде.
Соңғы бес жылда көлік саласының жалпы өнім көлемі 3 есеге өсті. Темір жолдардың өткізу қабілетін арттыру үшін 754 шақырым жаңа желі салынып, 3 мың шақырым жол жаңартылуда. Атап айтар болсақ, биыл «Мойынты – Қызылжар», «Дарбаза – Мақтаарал» учаскелерінің құрылысы аяқталады, сондай-ақ Астана – Қарағанды желісінде үшінші жолдарды салу басталады. Сонымен қатар ел тарихындағы ең ауқымды 124 вокзалды жаңғырту бойынша әлеуметтік бағдарлама іске қосылды, оның алғашқы 30-ы 1 шілдеге дейін пайдалануға берілді.
Өзгерістер басқа бағыттарға да әсер етеді. Автожол саласында 10 мың шақырым жол жөнделеді. Сонымен қатар көлемнің жартысы кестеден бұрын орындалды. Аэрохабтарды дамыту жұмысы 6 ірі аэропорттарға бағытталған. Бұл ретте Астана әуежайын жаңғырту басымдыққа айналады – құрылыс жұмыстары келесі жылы басталады.