Ақорда резиденциясында Қазақстанға ресми сапармен келген Бельгия Королі Филиппті салтанатты қарсы алу рәсімі өтті. Мемлекеттік деңгейдегі кездесуде екі елдің ресми делегациялары қатысып, дипломатиялық хаттамаға сәйкес құрмет көрсету рәсімдері ұйымдастырылды.
Салтанатты шараның ерекше сәттерінің бірі – Қазақстан мен Бельгияның Мемлекеттік Туларын желбіреткен Әскери әуе күштерінің тікұшақтары Ақорда алдынан ұшып өтті. Бұл рәсім мәртебелі меймандарды қарсы алуға арналған құрметтің белгісі болды.
Одан кейін Қазақстан Президенті Қасым-Жомарт Тоқаев пен Бельгия Королі Филипп бір-біріне ресми делегация құрамындағы тұлғаларды таныстырды. Құрмет қарауылы ротасының бастығы рапорт берген соң, Президенттік оркестр Қазақстан мен Бельгияның мемлекеттік әнұрандарын орындады.
Ресми қарсы алу рәсімі екі ел арасындағы дипломатиялық байланыстың маңызын айқындай түсті. Бельгия Королінің сапары Қазақстан мен Еуропа елдері арасындағы өзара іс-қимылды дамыту, саяси диалогты жалғастыру және ынтымақтастықтың жаңа бағыттарын талқылау тұрғысынан маңызды.