Ақтөбе облысында тиісті лицензиясыз қауіпті мұнай қалдықтарын қайта өңдеп, 393 миллион теңге табыс тапқан кәсіпорынның заңсыз қызметі әшкереленді. Сот шешімімен серіктестік директоры кінәлі деп танылып, заңсыз алынған қаражат мемлекет кірісіне өндірілді.
Ақтөбе облысының табиғатты қорғау прокуратурасы жүргізген тексеру барысында «ЖАН-АМИ и К» ЖШС-нің 2024–2025 жылдары қажетті мемлекеттік лицензиясыз қауіпті мұнай қалдықтарын қайта өңдеумен айналысқаны анықталды. Кәсіпорын осы кезеңде 1 400 тоннадан астам мұнай қалдығын өңдеп, заңсыз қызметінен 393 миллион теңге көлемінде табыс алған.
Аталған дерек бойынша прокуратура материалдарының негізінде сотқа дейінгі тергеп-тексеру басталды. Қылмыстық істі Экономикалық тергеп-тексеру департаменті жүргізді.
2026 жылғы 17 тамызда Ақтөбе қаласының №2 соты серіктестік директорын Қазақстан Республикасы Қылмыстық кодексінің 214-бабы 2-бөлігінің 2-тармағында көзделген құқық бұзушылықты жасағаны үшін кінәлі деп таныды. Сот оған мүлкін тәркілей отырып, 2 жыл 6 ай мерзімге бас бостандығын шектеу жазасын тағайындады.
Сонымен қатар Қазақстан Республикасының «Рақымшылық туралы» заңы негізінде сотталған адам негізгі жазадан босатылды. Алайда заңсыз алынған 393 миллион теңге мемлекет кірісіне өндірілді.
Сот үкімі апелляциялық сатыда өзгеріссіз қалдырылып, заңды күшіне енді. Осылайша, заңсыз қызметтен түскен қаражат мемлекетке қайтарылып, кәсіпорын басшысының әрекетіне құқықтық баға берілді.