Қазақстанның нотариат жүйесінде түбегейлі реформалар күтіп тұр. ҚР Парламенті Сенатының мәліметінше, енді нотариалдық палаталардың төрағалары өз лауазымдарында шексіз отыра алмайды, деп хабарлайды ult.kz.
Олардың өкілеттік мерзімі қатаң түрде шектелді: енді басшылық постты қатарынан 4 жылдан артық иеленуге болмайды, ал қайта сайлану мүмкіндігі тек бір-ақ рет беріледі.
Сонымен қатар, жүйені ашық әрі таза ету мақсатында бірқатар маңызды антикоррупциялық шаралар енгізілуде. Мәселен, нотариалдық палаталарға ресми жарғыда көрсетілмеген қандай да бір кіру жарналарын стажёрлер мен жаңа мамандардан жинауға үзілді-кесілді тыйым салынды.
Мүдделер қақтығысын болдырмау үшін басқару және бақылау органдарына жақын туыстардың қатысуына шектеу қойылып, сыбайлас жемқорлыққа қарсы қатаң талаптар енгізіліп жатыр.
Ал астыртын кулуарлық уағдаластықтарды толығымен жою үшін атқарушылық жазбалар енді бірыңғай цифрлық жүйе арқылы автоматты түрде бөлінетін болады.